Mövsümlə əlaqədar rast gəlinən xəstəliklər içərisində ilk sırada kəskin respirator virus infeksiyaları adlanan xəstəliklər qrupu dayanır. Payız və qış aylarında bu xəstəliklərin intensivliyi artır. Bunun əsas səbəbi bu aylarda immunitetin zəifləməsi, digər səbəbi isə soyuğun təsirindən tənəffüs yollarının selikli qişasının zədələnməsi nəticəsində tənəffüs yolları xəstəliklərinin baş verməsidir.

Bu barədə Aztibb.az-a Mingəçevir Şəhər Mərkəzi Xəstəxanasının həkimi Orxan Rzayev məlumat verib.

Onun sözlərinə görə, xəstəlik asqırma, öskürmə, boğazda ağrı, burun tutulması, burunaxması, qızdırma, əzələ ağrıları ilə müşayiət olunur. Ancaq xüsusilə hamilələr, yaşı 50-dən yuxarı olanlar, ağciyər, ürək xəstəliyi olanlar, eləcə də böyrək, qaraciyər çatışmazlığı olanlar, xərçəng, diabet kimi xəstəliklərə sahib insanlar immun sistemi zəif olanlar qripin təsirinə daha çox məruz qalırlar.

Orxan Rzayev əlavə edib ki, immun sistemini yaxşı vəziyyətdə saxlamaq üçün zərərli vərdişlərdən (siqaret çəkmək kimi) uzaq olmalıyıq, balanslı qidalanma, yüngül idman etmək, stresdən uzaq olmaq, günün çox hissəsini təmiz havada olmaq, yaxşı yuxu yatmaq bizi xəstəliklərdən qoruyan immun sistemimizi ən yüksək qorumalı vəziyyətdə saxlayır.

"Qripə yoluxmamaq üçün əl təmizliyi, sağlam qidalanma, mövsümə görə geyinmə kimi fərdi tədbirlərin görülməsi ilə yanaşı, xüsusilə də, risk altında olan insanlar üçün ən təsirli qorunma yolu peyvənddir.

Mövsümi qrip xəstəliyinə qarşı peyvənd olunmaqla xəstəliklərdən qorunmaq olar”, - deyə həkim bildirib.