Dəmir insan orqanizmi üçün ən vacib minerallardan biridir. Qana oksigeni daşımaq, enerji ilə təmin etmək, beyin fəaliyyətini yaxşılaşdırmaq kimi bir çox mühüm funksiyaları yerinə yetirir.

Həkim endokrinoloq Fərhad Burzu Aztibb.az-a bildirib ki, element orqanizmə qida vasitəsi ilə daxil olur.

Onun sözlərinə görə, qidalardan əldə edə biləcəyimiz dəmirin iki növü var. Orqanizm tərəfindən asanlıqla mənimsənilə bilən heme-dəmir ət, quş əti, balıq və dəniz məhsulları kimi heyvan mənşəli qidalarda olur.
Qeyri-heme dəmir, vücudumuz tərəfindən çətin mənimsənilir, meyvələr, yaşıl yarpaqlı tərəvəzlər, tam taxıllar, qoz-fındıq, toxum və paxlalılar kimi bitki qidaların tərkibində mövcuddur.

Endokrinoloq əlavə edib ki, C vitamini tərkibli qidalar orqanizimin dəmiri mənimsəməsini artırır. Buna görə də C vitamini yüksək olan qidaları (sitrus meyvələri, çiyələk, pomidor, bibər və s.) dəmirlə zəngin bitki qidaları ilə yanaşı istifadə etmək faydalıdır.

"Veganlar və vegetarianlar aşağı dəmir riski altındadır.
Heyvan mənşəli heç bir qida yemirsinizsə, dəmirlə zəngin bitki mənşəli qidalara üstünlük verməlisiz. Çünki, bədəndə dəmir azlığı anemiya, yorğunluq, başgicəllənmə və digər sağlamlıq problemlərinə səbəb ola bilər", - deyə o, əlavə edib.

Fərhad Burzu qeyd edib ki, dəmir çatışmazlığını müalicə etmək üçün istifadə olunan dərmanlar adətən dəmir əlavələridir. Bu əlavələr dəmir çatışmazlığını düzəltmək və bədəndəki dəmir ehtiyatlarını doldurmaq üçün istifadə olunur. Dəmir əlavələri həzm sisteminin pozulmasına və qəbizliyə səbəb ola bilər, ona görə də, dəmir əlavələri qəbul etməyə başlamazdan əvvəl həkiminizlə məsləhətləşin.