Şəmkir Rayon Mərkəzi Xəstəxanasında hemofiliya, talassemiya və irsi qan xəstəliklərindən əziyyət çəkən xəstələrə yardım məqsədilə qanvermə aksiyası keçirilib.

 

Xəstəxanadan Aztbb.az-a verilən xəbərə görə, aksiyaya rayonun hüquq-mühafizə orqanlarının, idarə, müəssisə və təşkilatlarının əməkdaşları, könüllülər qatılıblar.

 

Şəmkir Rayon İcra Hakimiyyəti aparatının məsul əməkdaşlarının da qoşulduğu aksiyada 250-yə yaxın insan donor qismində iştirak edib.

 

Toplanan qan hemofiliya, talassemiya və irsi qan xəstəliklərindən əziyyət çəkən insanların müalicəsinə sərf edilməsi üçün Mərkəzi Qan Bankına göndərilib.

 

Qeyd edək ki, artıq ənənəyə çevrilmiş bu humanist aksiyada RİH-in və rayonda fəaliyyət göstərən təşkilatların əməkdaşları hər il iştirak edirlər. Belə xeyriyyə tədbirlərinin gələcəkdə də davam etdirilməsi nəzərdə tutulur.