Hamiləliyin başlanğıcından etibarən dəriniz hər keçən gün daha da quruya bilər. Hamiləlik zamanı quru dəri qaşınma kimi problemlərə səbəb ola bilər.

Aztibb.az xəbər verir ki, Tərtər Rayon Mərkəzi Xəstəxanasının ginekoloqu Ləman Əliyeva bildirib ki, hamiləlik dövründə dərinin qurumasının əsas səbəbi progesteron hormonunun yüksək səviyyədə olması və metabolik sürətin dəyişməsidir. Mövsümi dəyişikliklərin təsiri ilə xüsusilə qış aylarında hamiləlik dövründə dəri quruluğundan daha çox şikayət edə bilərsiniz.

Həkim hamiləlik dövründə quru dəri üçün nə edilməli olduğunu açıqlayıb.

Onun sözlərinə görə, hamiləlik dövründə bədən quruluğunun ilk və ən təsirli həll yollarından biri bol su qəbul etməkdir. Su dərinizi nəmləndirəcək və dəri elastiklik qazanacaq.

"Çox isti su ilə duş qəbul etmək və bu temperaturun hamamın nəminə mənfi təsiri hamiləlik zamanı dərinin qurumasına yol açır.

Quruducu sabunlar və duş gelləri hamiləlik zamanı dərinin quruluğunu artıra bilər.

Hamiləlik dövründə quru dəri problemi olanlar mütləq hamamdan çıxan kimi nəmləndiricidən istifadə etməlidirlər", - deyə Ləman Əliyeva qeyd edib.

Ginekoloq bildirib ki, hamiləlik dövründə üzünüzdə qızartı, qabıqlanma kimi şikayətləriniz artıbsa və sizdə də sıx qaşınma varsa, həkiminizin tövsiyə etdiyi qaşınma əleyhinə kremlərdən istifadə edə bilərsiniz.