Normal ürəkdə nəbz dəqiqədə 60-100 dəfə təkrar olunur. Ürək vurğularının sayının 60 dan az olması bradikardiya kimi qiymətləndirilir.
Bu barədə Aztibb.az-a Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev məlumat verib.
Həkim bildirib ki, əgər insan fiziki olaraq sağlamdırsa və mütəmadi idmanla məşğul olursa, onda ürək vurğularının sayının 60 dan az olmasına baxmayaraq orqanların qan dövranında elə bir problemi olmur.
"Daimi idman edən birində nəbz dəyərləri 45/50-yə qədər düşə bilər", - deyən C.Gülmalıyev əlavə edib ki, sinir sistemi xəstəlikləri, miokard infarktı, qalxanvari vəzi funksiyasının azalması hipotireoz) və bəzi dərman preparatlarının təsiri nəticəsində nəbzimiz aşağı düşə bilər.
Uzman həkim qeyd edib ki, aşağıdakı hallarda nəbzin aşağı olması təhlükəli deyil:
İnsan dərman qəbul etmirsə;
Ürək getməsi yoxdursa;
İnsan mütəmadi olaraq idman edirsə.
"İnsanın normal nəbzi daimi olaraq aşağıdırsa - bu aşağı nəbz xəstəlik əlaməti deyil", - deyə G.Gülmalıyev vurğulayıb.
