Mərkəzi Gömrük Hospitalının Cərrahiyyə və Transplantasiya şöbəsinin cərrah-transplantoloqu Kamran Beydullayev səhiyyə naziri Teymur Musayev tərəfindən nazirliyin diplomu ilə təltif edilib.

 

Bu barədə Aztibb.az-a Hospitaldan məlumat verilib.

 

Bildirilib ki, Teymur Musayev Ümummilli Lider Heydər Əliyevin 100 illik yubileyinə həsr olunmuş Özbəkistan-Azərbaycan Səhiyyə Dekadası çərçivəsində özbəkistanlı həmkarları ilə cərrahi əməliyyatlar icra edən həkimlərlə görüş keçirib.

 

Tədbirdə nazir Teymur Musayev dekada çərçivəsində icra edilən cərrahi əməliyyatların, müalicə və müayinə tədbirlərinin hər iki ölkənin həkim mütəxəssislərinin bilik və bacarıqlarının artırılması ilə yanaşı əhalinin yüksək səviyyədə sağlamlığının qorunmasında mühüm addım olduğunu qeyd edib və onları Səhiyyə Nazirliyinin diplomları ilə təltif edib.

 

Xatırladaq ki, Özbəkistan-Azərbaycan Səhiyyə Dekadası çərçivəsində Azərbaycandan olan 14 həkim tərəfindən özbəkistanlı həmkarları ilə birgə yerli əhaliyə müasir tibbi avadanlıqlar vasitəsilə, yüksək peşəkarlıqla 100-dən artıq müxtəlif cərrahiyyə əməliyyatları icra edilib, müayinə və müalicələri həyata keçirilib.