Azərbaycan Tibb Universitetinin (ATU) I Mamalıq-ginekologiya kafedrasının professoru, tibb elmləri doktoru Nigar Kamilovanın ixtiraları Koreyada keçirilən beynəlxalq sərgidə yüksək qiymətləndirilib. 

Aztibb.az-ın xəbərinə görə, “Korea International Women’s Invention Exposition 2026” sərgisində iştirak edən ATU professorunun təqdim etdiyi ixtiralar sərginin medalları ilə təltif olunub. 

Professorun innovativ fəaliyyətində mamalıq və perinatal tibbdə rəqəmsal texnologiyalar, süni intellekt və tibbi gerontologiya xüsusi yer tutur. Onun müəllifləri sırasında olduğu PHI™ (Pregnancy Health Index) sistemi hamilə qadın və dölün fasiləsiz monitorinqinə, mümkün ağırlaşmaların erkən aşkarlanmasına və risklərin proqnozlaşdırılmasına yönəlib. Lifemap Human konsepsiyası isə süni intellekt əsasında insanın fərdi rəqəmsal əkizinin yaradılmasını nəzərdə tutur. 

N.Kamilovanın həmmüəllifi olduğu “Qadın cinsiyyət orqanlarının iltihabi xəstəliklərinin diaqnostikası üsulu” adlı ixtiraya da Avrasiya patenti verilib. 

Professorun beynəlxalq sərgidə qazandığı mükafatlar və yeni patent onun elmi-innovativ fəaliyyətinin beynəlxalq səviyyədə tanındığını göstərir.