Şamaxı Rayon Mərkəzi Xəstəxanasının təşkilatçılığı ilə Milli Hematologiya və Transfuziologiya Mərkəzi tərəfindən irsi qan (talassemiya, hemofiliya) və digər qan xəstəliklərindən əziyyət çəkən vətəndaşlarımıza yardım məqsədi ilə qanvermə aksiyası keçirilib.
Aztibb.az-a Rayon Xəstəxanasından verilən xəbərə görə, Şamaxı sakinləri bu nəcib və humanist xarakterli aksiyaya qoşularaq fəallıq nümayiş etdiriblər.
Tibb briqadasının hematoloqları tərəfindən hər bir donor tibbi müayinədən keçdikdən sonra, onlardan qan analizi götürülüb və aksiyaya qoşulması ilə bağlı rəy verilib.
Şamaxıda keçirilən aksiyada İcra Hakimiyyəti başçısı aparatın əməkdaşları, şəhərdə fəaliyyət göstərən idarə, müəssisə, təşkilatların sağlamlığı imkan verən əməkdaşları, könüllülər iştirak ediblər.
Ümumilikdə aksiyada 103 donor iştirak edib. Toplanan qan və onun komponentləri ehtiyacı olan xəstələrin müalicəsində istifadə olunacaq .
Humanizm prinsipləri əsasında həyata keçirilən belə tədbirlər ölkəmizdə irsi qan xəstəliklərindən əziyyət çəkən insanların təhlükəsiz və keyfiyyətli qanla təminatı üçün könüllü donor xidmətinin inkişafı baxımından mühüm əhəmiyyət daşıyır.
