Qlaukoma ən ağır göz xəstəliklərindən biri hesab olunur. Xəstəliyin terminal mərhələsində xəstə görməsini tamamilə itirə bilər. Xəstəliyin el arasında “qara su” adı ilə məşhur olmağı da bununla əlaqədardır.

 

Aztibb.az xəbər verir ki, bu barədə Şuşa Rayon Mərkəzi Xəstəxanasının oftalmoloqu Şəhla İsmayilzadə qlaukoma xəstəliyi ilə bağlı məlumat verərkən deyib.

Şəhla İsmayilzadə qeyd edib ki, müəyyən səbəblərdən göz daxilindəki maye dövranı pozulur və bunun nəticəsində göz təzyiqi artır. Nəticədə artmış göz təzyiqinə qarşı çox həssas olan görmə siniri getdikcə sıxılaraq atrofiyaya uğrayır, yəni quruyur. Tədricən geridönməz dəyişikliklər baş verir və xəstə görməsini itirir.

 

"Burada ən qorxulu məqam ondadır ki, bütün bunlar xəstə tərəfindən hiss olunmur, (əgər söhbət açıq bucaqlı qlaukomadan gedirsə) və görmənin itməsi tədricən baş verir. Ona görə də yaşı 40-dan yuxarı olan şəxslər ildə 1 dəfə göz təzyiqini yoxlatdırmalıdırlar. Xüsusilə də bu yoxlanma müəyyən risk qrupunda olan şəxslərə aiddir", - deyə oftalmoloq bildirib.

 

O, şəkərli diabet, arterial hipertenziya, hipotenziya, göz daxili təzyiqi normadan yuxarı olanların, irsi meyllilik, yüksək dərəcəli miopiya və ya hipermetropiya (uzağı və ya yaxını zəif görmə), eləcə də bəzi göz xəstəlikləri (xronik uveit, tor qişanın qopması, gözün şişləri və s.) olanların risk qrupuna daxil edildiyini söyləyib.

 

Oftalmoloq əlavə edib ki, qlaukomanın diaqnozu əsasən, görmə itiliyinin və göz təzyiqinin ölçülməsi, görmə sahəsinin və göz dibinin müayinəsinə əsasən qoyulur. Bəzən yardımçı müayinə metodları da gərək ola bilər:

 

"Göz təzyiqi hazırda qeyri kontakt tonometrlə ölçülür ki, bu müayinə pasiyentlər tərəfindən çox rahatlıqla qarşılanır. Xəstəliyin diaqnozu nə qədər tez qoyularsa, müalicə də o qədər effektiv olur".