Avropa İttifaqının maliyyə dəstəyi ilə həyata keçirilən “Psixi sağlamlıq xidmətlərinin münaqişədən sonrakı dövrdə koordinasiyası və transformasiyası” layihəsinin bağlanış tədbiri keçirilib.

 

Aztibb.az bu barədə ÜST-nin Azərbaycan Nümayəndəliyinin feysbuk səhifəsinə istinadla xəbər verir.

 

Tədbirdə iştirak edən ÜST-nin Azərbaycandakı nümayəndəsi Hande Harmancı, səhiyyə nazirinin müavini Nadir Zeynalov, İcbari Tibbi Sığorta üzrə Dövlət Agentliyinin İdarə Heyətinin sədrinin müşaviri Nelli Veysova, TƏBİB-in icraçı direktorunun müavini Anar İsrafilov layihənin fəaliyyəti boyunca 2 il ərzində görülən işlər, nailiyyətlər və perspektivlər barədə çıxış ediblər.

 

ÜST-nin Regional ofisinin nümayəndəsi Melita Murko “Psixi sağlamlığın regional prespektivi”, regional məsləhətçi Peter Hughes “mhGAP: psixi sağlamlıq və psixo-sosial dəstəyin (PSPSD) ilkin səhiyyə xidmətinə inteqrasiyası və qayğı modelinin transformasiyası”, ÜST-nin Ölkə Ofisinin psixi sağlamlıq və qeyri-yoluxucu xəstəliklər üzrə proqram rəhbəri Elturan İsmayilov “Layihənin nailiyyətləri və çətinlikləri” və TƏBİB-in İlkin səhiyyə xidmətinin təşkili şöbəsinin müdiri Nəhmət Rəhmanov “Layihənin ilkin səhiyyə xidmətindəki əhəmiyyəti” mövzusunda təqdimatlarla çıxış ediblər.

 

Qeyd edək ki, keçmiş təmas xəttinə yaxın 5 rayonu əhatə edən - Ağdam, Ağcabədi, Bərdə, Füzuli və Tərtər - layihənin əsas məqsədi münaqişənin təsirinə məruz qalmış əhalinin psixi sağlamlıq və psixososial dəstək xidmətlərinə əlçatanlığını yaxşılaşdırmaq üçün ilkin səhiyyə xidməti müəssisələrində psixi sağlamlıq xidmətləri potensialını artırmaq olub.