"Dahi təbiblər" rubrikamızda bu dəfə Azərbaycan Cümhuriyyəti Parlamentinin üzvü, Zaqafqaziya Tibb Cəmiyyətinin həqiqi üzvü, Bakı Tibb Cəmiyyətininin təsisçisi, vətəndaşlara ödənişsiz və ambulator yardım təşkil edilməsinin ilk banilərindən olan Məmmədrza ağa Vəkilovdan bəhs edəcəyik.

 

O, 8 mart 1864-cü ildə Qazax rayonunun Salahlı kəndində anadan olub. 1876-cı ildə I Tiflis klassik gimnaziyasında təhsilini başa vurub, 1887-1893-cü illərdə Xarkov Universitetinin Tibb fakültəsində təhsil alıb.

 

M.Vəkilov əmək fəaliyyətinə Tiflisdəki Mixaylovsk xəstəxanasında başlayıb. 1895-ci ildə Əbdülxalıq Axundov və Kərim bəy Mehmandarov ilə birgə Bakı Tibb Cəmiyyətini təsis edib.

 

1896-cı ildə Qars dəmiryolu xəttinin tikintisində sahə həkimi işləyib, 1898-ci ildə həmin ərazidə tikilən 50 çarpayılıq xəstəxanaya müdir təyin olunub. Daha sonra isə həkim-ordinator kimi Bakıya Dəmiryolu Xəstəxanasına göndərilib.

 

1900-cü ildə Bakı şəhər Duması ilk dəfə olaraq “kasıblar üçün həkim” vəzifəsinin ştatını təsdiq edib və bu vəzifəyə sahə həkimi kimi M.Vəkilov seçilib. Vətəndaşlara ödənişsiz xidmət göstərən M.Vəkilov 1 ilə yaxın sahə həkimi işləyib və əhalinin nə qədər ambulator müalicəyə ehtiyacı olduğunun şahidi olub.

 

O, Bakı Şəhər Tibb Cəmiyyəti və Bakı Şəhər Duması qarşısında müalicəxanaların açılması barədə dəfələrlə təkliflərlə çıxış edib. 1902-ci ildə bu barədə layihə təqdim edib. Layihədə şəhərin müxtəlif yerlərində insanların ödənişsiz xidmət ala biləcəyi klinikaların açılması, xəstəliklərin yayılmasının qarşısının alınması və b. məsələlər yer alıb.

 

Uzun mübarizədən sonra özünün rəhbərliyi ilə ödənişsiz fəaliyyət göstərən 6 klinikanın açılmasına nail olan M.Vəkilov əhaliyə ambulator yardım təşkil edilməsinin ilk banilərindən biri hesab olunur.

 

Məmmədrza Ağa Vəkilov 30 dekabr 1944-cü ildə Bakı şəhərində vəfat edib.