Bugünlərdə demək olar ki, ən çox icra olunan əməliyyatlardan biri də xolesistektomiyadır. Bu əməliyyat öd kisəsinin bədəndən xaric edilməsi ilə icra olunur.
Aztibb.az xəbər verir ki, həkim-radioloq Şəbnəm Topbaştekin bildirib ki, xolesistektomiya iki üsulla (cərrahi və laparoskopik) aparılır.
Onun sözlərinə görə, öd kisəsi xaric edildikdən sonra 10% hallarda postxolesistektomiya sindromu adlanan vəziyyət yarana bilər. Belə halda xəstələrdə öd kisəsi əməliyyatından əvvəl olan şikayətlər təkrarlanır.
Ş.Topbaştekin qeyd edib ki, laparoskopik əməliyyatın açıq cərrahi əməliyyatdan üstünlüyü 10-15 sm.-lik kəsik yerinə 4 ədəd kiçik dəlik olması, anesteziya müddətinin və anestetikin miqdarının az olması, xəstəxana infeksiyası riskinin, müalicə və baxım maliyyətinin az olması, xəstənin daha tez sağalıb iş qabiliyyətini daha erkən bərpa etməsi, əməliyyat sonrası ağrıların daha az olmasıdır. Bu əməliyyat bəzi hallarda tətbiq olunmur. Belə hallara xəstənin çox kilolu olması, əvvəlcədən qarın boşluğunda icra olunmuş böyük əməliyyat aiddir.
"Bu üsulun müsbət cəhətləri olduğu kimi, ağırlaşmaları da vardır. Bunlara öd kanalının yaralanması, infeksiya, pnevmaniya, qanaxma, öd kisəsi daşlarının tamamilə çıxarılmaması, öd daşlarının qarına düşməsi, ümumi öd axarında daşın qalması, öd kanalının daralması, yırtıq, abses və s. aiddir. Yaralanmaya aid olan ağırlaşmaya biliomanı nümunə göstərmək olar. Bilioma öd yollarının travmatik zədələnməsindən sonra yaranaraq daxili öd möhtəviyyatı ilə dolu olan kistik törəmədir", - deyə radioloq bildirib.
Həkim əlavə edib ki, ağırlaşma olan xəstələrdə əməliyyat yerində axıntı, qarının sağ üst tərəfində ağrı, üşütmə, yüksək və davamlı qızdırma, öskürək, iştahsızlıq, ürəkbulanma və qusma və s. olur. Əlamətlər əməliyyatdan 1 həftəyə qədər müddətdə başlayır. Diaqnoz xəstənin şikayətləri və ultrasəs müayinəsi vasitəsilə qoyulur: "Ağırlaşmaları nəzərə alaraq əməliyyat üçün daha təcrübəli cərraha müraciət edilməli, bütün müayinələrdən keçməli və əmliyyat üsulu cərrahın qərarı ilə icra olunmalıdır".
