Burun çəpərinin əyriliyi burun boşluğunu iki hissəyə ayıran qığırdaq və sümüyün sağa və sola, yaxud hər iki tərəfə əyilməsidir. Burun çəpəri əyriliyi yıxılma, buruna və üzə zərbə nəticəsində, burun və üz skletinin formalaşması zamanı bir-birinə nisbətən qeyri-mütənasib inkişafı ilə əlaqədar yaranır.

Aztibb.az xəbər verir ki, Nərimanov Tibb Mərkəzinin otorinolarinqoloqu Abdulla Hüseynov bildirib ki, burun çəpəri əyri olan insanlar əsasən burunun davamlı tutulmasından şikayət edirlər: "Belə xəstələrdə baş ağrısı, ağızla nəfəs alma, tez yorulma, tənginəfəslik, yaddaş zəifliyi, xroniki ürək-ağciyər xəstəliklərinin əmələ gəlməsinə yol açır".

Onun sözlərinə görə, diaqnoz əsasən xəstənin şikayətlərinə və endoskopik rinoskopik müayinə nəticəsində qoyulur. Rentgen və kompüter tomoqrafiya zamanı da bu diaqnozu qoymaq mümkündür.

A.Hüseynov qeyd edib ki, burun çəpərinin cüzi əyriliyi tənəffüsun pozulması yoxdursa əməliyyat olunmur. Yuxarıda sadalanan əlamətlər varsa əməliyyata göstərişdir.

"Əməliyyat ümumi narkoz altında aparılır. Əməliyyat zamanı burun çəpərinin qığırdaq və ya sümük hissəsində olan əyriliklər düzləşdirilir, ya da xaric edilərək burun çəpərinin orta xəttinə qoyulur. Burun tənəffüsu bərpa olunur", - deyə həkim əlavə edib.