Dermatoqrafizm dərinin yüngül təzyiq və ya sürtünməyə həddindən artıq reaksiya verməsi ilə xarakterizə olunan fiziki övrə növüdür. Dəri cızıldıqda həmin nahiyədə qısa müddətdə qızartı, şişkinlik və qaşınma yarana bilər. Bu səbəbdən xalq arasında “dəriyə yazı yazma allergiyası” da adlandırılır.

Aztibb.az xəbər verir ki, dermatoqrafizmdə mexaniki təsir dəridəki mast hüceyrələrinin aktivləşməsinə və histamin ifrazına səbəb olur. Nəticədə damarlar genişlənir, toxumalara maye keçir və cızılan nahiyədə qabarıq iz yaranır. Əlamətlər adətən bir neçə dəqiqə ərzində başlayır və çox vaxt 30 dəqiqədən bir neçə saata qədər davam edir.

Dermatoqrafizm klassik allergiya hesab edilmir. Qida və ya dərman allergiyasından fərqli olaraq burada əsas tətikleyici allergen deyil, mexaniki təsirdir. Bununla belə, histaminin rolu səbəbindən antihistamin preparatlar simptomların azaldılmasında istifadə oluna bilər.

İsti və soyuq temperatur dəyişiklikləri, stress, fiziki fəaliyyət və tərləmə, dar və kobud geyimlər, dərinin sərt dəsmalla sürtülməsi əlamətləri gücləndirə bilər. Bu səbəbdən yumşaq və boş geyimlərdən istifadə etmək, dərini sürtmədən qurulamaq və uyğun nəmləndiricilərdən istifadə etmək faydalıdır.

Dermatoqrafizm diaqnozu adətən həkimin dərini küt əşya ilə yüngülcə cızması və yaranan reaksiyanı müşahidə etməsi ilə qoyulur. Əlavə müayinələr isə yalnız başqa xəstəliklərdən şübhələnildikdə tələb oluna bilər.

Müalicədə əsas məqsəd simptomları nəzarətdə saxlamaqdır. İkinci nəsil antihistaminlər həkim məsləhəti ilə istifadə edilə bilər. Dərmanlar xəstəliyi mütləq şəkildə aradan qaldırmır və müalicənin müddəti fərdi olaraq müəyyənləşdirilir.

Dermatoqrafizm bəzi insanlarda aylar ərzində öz-özünə zəifləyə bilər, digərlərində isə uzun müddət davam edə bilər. Əlamətlər gündəlik həyata ciddi təsir göstərirsə, uzun müddət keçmirsə və ya şikayətlər güclənirsə, dermatoloq və ya allerqoloqa müraciət etmək tövsiyə olunur.