Yaponiyanın Kumamoto şəhərinin icra hakimiyyəti məktəblərdə dərsdən yayınma və zorakılığa qarşı mübarizə çərçivəsində şagirdlərin əvəzinə məktəblərə robotların göndərilməsini təklif edib.

Aztibb.az “Insider Paper” portalına istinadən xəbər verir ki, hündürlüyü bir metrdən çox olmayan özüyeriyən robotların bu ilin noyabr ayından başlayaraq müstəqil şəkildə sinifdən-sinfə keçərək, şagirdin onları uzaqdan idarə edəcəyi təhsil müəssisələrinə göndərilməsi təklif olunub.

Tələbələrin idarə etdiyi robotlardan istifadə ideyası ölkə hakimiyyətinin tələbələrin dərsdən yayınma hallarının artması ilə bağlı narahatlığı fonunda yaranıb.

Portal yazır ki, məktəblilər həmyaşıdları tərəfindən təhqirlərə məruz qaldıqları üçün belə addım atıblar.

“Bu robotlar vasitəsilə ünsiyyət tamamilə real deyil, lakin hələ də əmin olmayan və başqaları ilə ünsiyyətdən qorxan uşaqlara müəyyən reallıq hissi verə bilər. Ümid edirik ki, bu, belə uşaqlara qorxularının öhdəsindən gəlməyə kömək edəcək”, - deyə şəhər merinin sözçüsü Maki Yoşizato bildirib.

Təhsil Nazirliyinin son sorğusuna görə, Yaponiyada ibtidai və orta məktəblərdə dərsdən yayınan şagirdlərin sayı 2021-ci ildə 244,940 hadisə ilə rekord həddə çatıb.