Sentyabrın 15-də Azərbaycan Tibb Universitetinin (ATU) yeni yaradılan Təcili tibb kafedrasında I Müalicə-profilaktika fakültəsinin IV kurs tələbələri üçün ilk mühazirə keçirilib.

ATU-dan Aztibb.az-a bildirilib ki, ilk mühazirə kafedranın müdiri, dosent Nadir Zeynalovun təqdimatında olub.

N.Zeynalov bildirib ki, 2021-ci ilin dekabrında Böyük Elmi Şuranın qərarı ilə Təcili tibb kafedrasının təşkilinə hazırlıq işlərinə başlanılıb. Onun sözlərinə görə, bu kafedranın yaranmasında Ümumdünya Səhiyyə Təşkilatının ölkəmizdəki nümayəndəliyinin böyük xidməti olub. Belə ki, həmin nümayəndəliyin Azərbaycanda həyata keçirdiyi layihələrin istiqamətlərindən biri də təcili tibbi yardım sisteminin təkmilləşdirilməsi idi.

Təcili tibb sahəsində yeni strukturların yaradılması və mütəxəssislərin hazırlanmasının artıq zərurətə çevrildiyini söyləyən kafedra müdiri, proqramların dünyanın qabaqcıl ali təhsil müəssisələrinin tədris proqramlarına uyğunlaşdırılması baxımından Təcili tibb kafedrasının təşkilinin məqsədəuyğun hesab edildiyini vurğulayıb.