Erkən nikah yaşı 18-dən az olan yeniyetmələrin nikaha daxil olmasıdır. Nikaha daxil olma 18 yaş qəbul olunsa belə, bu qanunlar əksər hallarda pozulur. Burada ən diqqətçəkən məqam erkən yaşda evliliyə məcbur edilən qız uşaqlarının psixoloji və ginekoloji sağlamlığıdır.

 

Aztibb.az xəbər verir ki, Mingəçevir Şəhər Mərkəzi Xəstəxanasının Ailə Sağlamlıq Mərkəzinin mama-ginekoloqu Esmira Hüseynova bildirib ki, fiziki və psixoloji baxımdan hazır olmadan nikaha cəlb edilən qızlarda hamilə qalmaq onlar üçün risk faktoru hesab edilir. Ailə qurmaq və ana olmaq üçün qızların orqanizmi müəyyən qədər formalaşmalıdır və bədənin hormonal funksiyası tamamlanmalıdır. Hələ 17 yaşı tamam olmayan qızlar ailə quran zaman onların orqanizmində reproduktiv sistem və endokrin orqanlar hələ öz funksiyalarını başa çatdırmamış vəziyyətdə olurlar. Ona görə də erkən yaş doğumlarında ana və uşaq ölümləri, əlil uşaq dünyaya gətirmə riski daha böyükdür.

 

Mama-ginekoloq vurğulayıb ki, bir həkim olaraq erkən və məcburi nikahlara qarşı birgə mübarizə aparmalıyıq. Övladlarımıza iqtisadi yük kimi deyil, cəmiyyətin dəyərli üzvləri kimi baxmalıyıq. Hər bir ölkənin gələcəyi gənclərdir. Gələcəyimiz üçün və sağlam nəsil dünyaya gətirmək naminə övladlarımızın təhsilli, sağlam və yaradıcı olması, həmçinin nikaha cəlb edərkən yaşına diqqət edilməsi xüsusilə vacibdir.