O, 31 dekabr 1934-cü ildə Ordubad rayonunun Üstüpü kəndində doğulub. 1958-ci ildə N.Nərimanov adına Azərbaycan Dövlət Tibb İnstitutunun Müalicə-profilaktika fakültəsinə daxil olub. Təhsil aldığı müddətdə Kliniki Tibbi Mərkəzin (keçmiş “Semaşko”) Cərrahiyyə şöbəsində feldşer kimi çalışıb.

Azərbaycan Nazirlər Sovetinin və Mərkəzi Komitənin qərarı ilə 1963-1964-cü illərdə yay mövsümü zamanı Azərbaycandan Şimali Qazaxıstana gedən 575 nəfər tələbə inşaat dəstəsinin komandiri və baş həkimi təyin edilib. O, Şimali Qazaxıstanın Selinoqrad vilayətində xəstəxanalar, məktəblər, yaşayış binaları və uşaq bağçalarının tikintisinə rəhbərlik edib.

 

Cəfər Quliyev 1963-cü ildə kombaynın altına düşərək ağır xəsarətlər alan Anatoli adlı oğlana səhra şəraitində özündən qan köçürüb, onun üzərində ağır cərrahiyyə əməliyyatı aparıb. Bu barədə "Komsomolskaya pravda" qəzetində "Spasibo za sına" adlı məqalə dərc edilib.

 

O, 1965-ci ildən taleyini Sumqayıt şəhəri ilə bağlayıb. Əvvəlcə Azərbaycan Boru-Prokat Zavodunun tibb bölməsində cərrah işləyib, sonra isə 1 nömrəli xəstəxanada həkim-cərrah kimi çalışıb. 1981-ci ildən 2016-cı ilədək Sumqayıt Şəhər Təcili Tibbi Yardım Xəstəxanasının Cərrahiyyə şöbəsinin müdiri olub.

 

Tanınmış cərrah Cəfər Quliyev Sumqayıtda tibb işçilərindən ibarət "Loğman" ansamblı yaradıb. Yüzlərlə cərrahiyyə əməliyyatını müxtəlif dillərdə lentə köçürülən musiqi sədaları altında həyata keçirib. 1983-cü ildə "SSRİ səhiyyə əlaçısı" adına layiq görülüb. Azərbaycan Respublikasının yüksək dərəcəli cərrahı olub.

 

50 ildən artıq əhalinin sağlamlığı keşiyində dayanaraq xalqına sədaqətlə xidmət etmiş Cəfər Quliyev 2 dəfə şəhər Xalq Deputatları Sovetinin deputatı seçilib, Azərbaycan Jurnalistlər Birliyinin və Azərbaycan Yazıçılar Birliyinin üzvü olub. Həmçinin Məmməd Araza həsr edilən "Haqqın var yaşamağa", "Bu da belə bir ömürdür", akademik Rəhim Rəhimov haqqında yazılan "Ordubaddan doğan günəş", tanınmış cərrah İzzət Sadıxova həsr edilən "Burdan bir loğman köçdü" və “Tüstü də var ocaq söndürür" kitablarının müəllifi olub.

 

O, öz üzərində sağ tərəfi boğulmuş qasıq yırtığı əməliyyatı aparan dünyada sayılan həkimlərdən idi.

 

Cəfər Quliyev ölkə başçısı tərəfindən 2004-cü ilin dekabr ayında "Şöhrət" ordeni ilə təltif olunub.

 

2021-ci ilin avqustun 13-də vəfat edib.