Koronavirus infeksiyasından qorunmağın bir neçə məlum yolu mövcuddur. Bunlara fərdi qoruyucu vasitələr taxmaq, əlləri yumaq və antiseptiklərdən istifadə etməyi misal göstərmək olar. Bununla yanaşı, bir vacib məqam da var. İtlərlə gəzintidən sonra onları yuyundurmaq lazımdır, çünki virus hissəcikləri itlərin dərisinə çox asanlıqla hopur.

Aztibb.az xəbər verir ki, bu barədə Rusiya Milli Tədqiqat Texnoloji Universitetinin Fiziki Kimya kafedrasının dosenti, bioloq Georgi Frolov məlumat verib.

"Tükün üzərinə virus asanlıqla hopur. Ancaq onu yumaqla aradan qaldırmaq mümkündür. Lakin tükün dezinfeksiyaedici vasitələrlə təmizlənməsi ev heyvanının sağlamlığına zərər verə biləcəyi üçün diqqətli olmalısınız. Ən yaxşı həll yolu sadəcə su ilə yumaqdır", - deyə ekspert açıqlamasında qeyd edib.

G. Frolov virus hissəciklərinin insan dərisindən yaxşı təmizləndiyini izah edib. Gündəlik gigiyenaya diqqət yetirilməsi xəstəliklərin qarşısını almağa kömək edir.