Dəridə səpki və hərarət varsa, bu allergiya deyil, yoluxucu xəstəliyin işarəsidir. Çünki, allergiya zamanı hərarət qısa müddətdə və kəskin halda davam edir.

 

Adətən koksaki virusuna yolxma zamanı hərarətli günlərdən sonra ağız ətrafında səpkilər müşahidə olunur. Eyni zamanda, əllərə, ayaqlara da diqqət edilməlidir. Sulanmağa, xoralaşmağa meyilli olan və göynədən səpkilər körpələrdə bütün ayaq və qola yayıla bilsə də bütün gövdəyə yayılmır. Çox hallarda bu səpkilər müalicə olunmadan bir həftə müddətinə yox olur.

 

Aztibb.az-ın xəbərinə görə, bu barədə Mingəçevir Şəhər Mərkəzi Xəstəxanasının Ailə Sağlamlıq Mərkəzinin pediatrı Gülnarə Rüstəmova uşaq dərisində yaranan səpkilər haqqında danışarkən bildirib.

Həkim qeyd edib ki, uşaqda yüksək hərarətlə birlikdə qırmızı gözlər, bütün bədənə yayılan sıx, xırda, tikanbatıcı hisslərlə narahat edən səpkilər müşahidə olunursa, bu qızılca virusu ola bilər. Bu halda uşaqlar mütləq həkim müşahidəsi altında müalicə olunmalıdır:

 

"Əgər uşaq hərarətli və ya hərarətsiz, əhvalı pozulmadan, deyə-gülə səpirsə və bu səpkilər başın tüklü hissəsindən başlayıb bədənə yayılırsa, içi sulu, qaşınandırsa, bir yerində sulu səpki, bir yerində quruyan səpki görürüksə, çox güman ki, bu suçiçəyi virusudur".

 

Onun sözlərinə görə, hərarət olmadan müşahidə olunan tək yaranan sulu səpki sonradan kənarlara doğru dərini açaraq yayılıb, sulanıb, üstü yara bağlayıb və artırsa, bu, sarıyara xəstəliyindən xəbər verir. Hərarətlə birlikdə boyunda limfa düyünlərinin böyüməsi, halsızlıq, solğun dəri üzərində xırda səpkilər varsa, məxmərək xəstəliyinə işarədir.

 

Gülnarə Rüstəmova suçiçəyi, qızılca və məxmərək xəstəliyinə yoluxan zaman ağırlaşmaların olmaması üçün bu xəstəliklərə qarşı peyvəndlənmənin önəmini vurğulayıb.