Qızıl yel streptokokk mikrobun törətdiyi ağır infeksion xəstəlikdir. Qızılyel törədici A qrup betta hemolitik streptokokklardır. Yoluxma əsasən dəri və selikli qişalar, tənəffüs yolları ve bəzən hematogen yolla da olur ki, bu zaman sepsis baş verir. Mövsümlə bağlı olaraq daha çox payız-qış aylarında aktiv olur.
Aztibb.az xəbər verir ki, bu barədə Mingəçevir Şəhər Mərkəzi Xəstəxanasının Yoluxucu Xəstəliklər bölməsinin həkim infeksionisti Afət Süleymanova məlumat verib.
İnfeksionist qeyd edib ki, orqanizmində streptokokk ocağı olan hər kəsdə bu xəstəlik yarana bilər. Xüsusilə revmatizm, revmatoid artrit, skarlatina, angina, frunkulyoz, bundan basqa şəkərli diabet, limfa və qan dövranı pozğunluğu olanlar bu xəstəliyə daha həssasdır. Çünki bunlarda hemolitik streptokokklara qarşı ləng tipli həssasliq daha yüksək olur. Qızılyel toksiko-allergik xəstəlikdir. Xəstəliyin patogenezində damar zədələnmələri əsas rol oynayır, qan dövranı pozulur.
Onun sözlərinə görə, xəstəlik 2-4 günlük inkubasion dövrdən sonra birdən birə yüksək temperatur, baş və əzələ ağrıları ilə başlayır. 12-36 saat sonra zədələnmə yerində dəridə göynəmə, ağrı, daha sonra qızartı və qalınlaşma olur. Xəstə dəhşətli ağrılardan və göynəmədən şikayətlənir. Əl vurduqda ağrı daha da şiddətli olur.
"Xəstəliyin 4 forması var eritematoz, eritematoz-bulloz, eritematoz-hemorragik, bulloz-hemorragik. Hər bir formanın özünə məxsus xüsusiyyətləri var. Eritematoz forma üçün daha çox kəskin və aydın sərhədləri olan xəritəyəbənzər forma xarakterdir. Vaxtında müalicə olunsa bir neçə günə sağalır. Yerində qabıqlanma verir. Bulloz formada suluqlar formalaşır. Bəzən suluq yerində qansızma, eroziya, xoralar ola bilir. Yara ətrafında limfa damarlari iltihablaşır.
Həmçinin ağızda damağın selikli qişasının zədələnməsi özünü hiperemiya, angina, suluqlar şəklində, burnun zədələnməsi rinit şəklində də göstərir. Qanda leykositoz,EÇS-in artmasi müşahidə olunur.
Bundan başqa tez-tez residivlər baş verə bilər. Bu zaman ilkin zədə yeri iltihablaşır, bədən temperaturu yüksəlir, halsızlıq yaranır. Vaxtında müalicə olunmasa irinli ağırlaşmalar baş verə bilər", - deyə Afət Süleymanova əlavə edib.
Həkim bildirib ki, müayinə üçün xüsusi üsul yoxdur. Xəstədən ümumi qan analizi alınır, streptokokk fermentləri yoxlanılır. Müalicə üçün antibiotiklər, ağrı kəsicilər, qan dövranını yaxşılaşdıran preparatlar təyin olunur. Xəstəyə gigiyenik qaydalara əməl olunması, zədə nahiyyəsinin immobilizasiyası məsləhət görülür.
