Uşaqlar arasında baş verən xəstəliklərin siyahısında travmalar birinci yerdə durur. Aztibb.az xəbər verir ki, bu travmaların çoxu çıxıqlar və sınıqlardan ibarətdir.
Oynaq sümükləri uclarının oynaq boşluğunda yerdəyişməsi zamanı çıxıq baş verir. Belə halda oynaq kisəsinin tamlığı pozulur, bəzən isə oynaq bağları qırılır. Oynaqlarda ağrıların olması, hərəkətin çətinləşməsi, oynağın formasının dəyişilməsi, adi vəziyyətdə dayanmaması, oynaqda çıxığın baş verməsini göstərir. Oynaqda çıxıq baş verərkən ətrafları immoblizasiya etməklə (tərpənməz hala salmaqla) oynağı rahat vəziyyətə qoyub sarınır. İri oynaqlarda çanaq, bud, diz, bazu oynaqları, habelə onurğaarası oynaqda çıxıq baş verdikdə isə zədələnmiş insana ağrıkəsici dərman vurmaq məsləhət görülür.
Onurğaarası oynaqlarda çıxıq baş verdikdə xəstəni bərk lövhədə kürəyi üstə uzatmaqla həkimə aparmaq lazımdır.
Kəskin hərəkət edərkən, zərbə nəticəsində, hündür yerdən yıxılarkən, avtomobil və ya velosiped qəzaları zamanı sümüklərdə sınıqlar baş verir. Qapalı sınıqlar zamanı dərinin tamlığı pozulmur, açıq sınıqlar zamanı isə dəridə yaralanmalar baş verir.
Sınıqları hərmişə tez müəyyən etmək olmur, buna görə də, şübhəli vəziyyət aşkar olunduqda dərhal həkimə müraciət etmək lazımdır. Sınıqlar zamanı ilk tibbi yardım sınan nahiyyəni tərpənməz hala gətirməkdən ibarətdir. Xəstənin zədələnmiş nahiyyəsini hərəkət etdirmədən həkimə çatdırmaq lazımdır.