Tibbdə ateroskleroz kimi tanınan damar sərtliyi xüsusilə 45 yaşdan yuxarı şəxslərdə daha çox rast gəlinir. Müalicə edilməzsə, geri dönməz nəticələrə səbəb ola bilər. İnfarkt və beyin qanaması başda olmaqla ölümlə nəticələnən bir çox xəstəliklərin altında yatan əsas səbəb məhz aterosklerozdur.

Bu barədə məlumat verən Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev bildirib ki, birbaşa qidalanma ilə əlaqəli olan bu xəstəlik yanlış qidalanma vərdişləri davam etdiyi müddətcə ağır nəticələrə səbəb olar.

Onun sözlərinə görə, aterosklerozlu pasiyentin pəhrizində yağdan alınan enerji miqdarı 30%-dən çox olmamalıdır.

Uzman həkim qeyd edib ki, damar sərtliyi olanlar meyvə və tərəvəzlərlə zəngin pəhrizə əməl etməlidirlər. Doymuş yağlar yerinə zeytun yağı və ya qarğıdalı yağı kimi bitki yağları istehlak edilməlidir:

"Heyvan daxili orqanlarının (içalat) istehlakından qaçınmaq lazımdır. Həmçinin ətin yağsız hissələrinə üstünlük verilməlidir. Toyuq dərisi istehlak edilməməlidir. Gündəlik duz istehlakı 6 qramla məhdudlaşdırılmalıdır".

C.Gülmalıyev əlavə edib ki, damar sərtliyi olanlar qızardılmış yeməklər yerinə bişmiş qidalara üstünlük verilməlidirlər. Ət yağlı qida olduğundan əlavə yağ istifadə edilməməlidir. Bundan başqa, soğan, moruq və portağal kimi antioksidantlarla zəngin pəhriz yaradılmalıdır. Siqaret dayandırılmalı və gündəlik 30 dəqiqəlik gəzinti və ya orta fiziki fəaliyyətlə məşğul olmaq lazımdır.