İspaniyanın müxtəlif universitet və institutlarından olan bir qrup tədqiqatçı bu yaxınlarda insan oqanizmində sink səviyyəsinin COVID-19-a təsiri barədə araşdırma nəşr etdirib.
Aztibb.az medimagazin.com.tr-yə istinadla xəbər verir ki, tədqiqata görə, xəstəliyin ilkin mərhələlərində sink səviyyələrini bilmək əhəmiyyətlidir. Analizlər nəticəsində tədqiqatçılar aşağı sink səviyyələri ilə COVID-19-un ağırlıq dərəcəsi və ölüm nisbəti arasında güclü bir əlaqə olduğunu bildiriblər. Sink çatışmazlığı COVID-19-a yoluxmuş və ölüm riski altında olan şəxslərdə immun balansının pozulmasına səbəb ola bilər.
Tədqiqatçılar 249 COVID-19 xəstəsini əhatə edən bir müşahidə tədqiqatı aparıblar. SARS-CoV-2 virusunun müxtəlif sink konsentrasiyalarında təkrarlanmasını da analiz ediblər. Tədqiqat nəticələrinə görə, sink səviyyəsi 50 mkq / dl-dən aşağı olan şəxslərdə daha ağır klinik nəticələr müşahidə edilib. Bundan əlavə, ölüm nisbəti daha yüksək olub. Tədqiqatın in vitro nəticələri, daha az sink səviyyəsinin SARS-CoV-2-yə yoluxmuş hüceyrələrdə viral genişlənməni dəstəklədiyini göstərir.