Seul Beynəlxalq Universiteti Xəstəxanasının professoru Park Sang-min və onun tədqiqat qrupu tərəfindən aparılan araşdırmalar körpələrdə antibiotik istifadəsinin kökəlməyə səbəb ola biləcəyini müəyyənləşdirib.

Aztibb.az medimagazin.com.tr-yə istinadla xəbər verir ki, tədqiqat çərçivəsində 2008-2012-ci illər arasında körpəlik dövründə müayinə olunan 31 733 uşaq müşahidə edilib və doğuşdan sonrakı ilk 24 ayda antibiotik istifadəsinin uşaqların kökəlməsinə təsiri analiz edilib.

Bu dövrdə nə qədər çox antibiotik istifadə olunarsa, piylənmə riski bir o qədər yüksəkdir. Mütəxəssislər ilk 6 ayda antibiotik qəbul edən uşaqlarda piylənmə ehtimalının 18-24 aylıq dövrdə qəbul edənlərə nisbətən 33 faiz daha çox olduğunu bildirib.

Tədqiqat körpəlikdə ən az 5 dəfə antibiotik müalicəsi alanların kök olma riskinin yalnız bir dəfə antibiotik qəbul edənlərə nisbətən 42 faiz daha yüksək olduğunu aşkar edib.

Mütəxəssislər antibiotik istifadəsi ilə bağırsaq florasının zədələnməsinin köklüyə səbəb olduğuna diqqət çəkirlər. Uşaq köklüyünün yüksək təzyiq, diabet, hiperlipidemiya və metabolik sindroma yol aça biləcəyi və uşaqlıqda kök olan hər 3 nəfərdən birinin yetkinlik yaşında bu problemlə mübarizə apardığı vurğulanıb.