Azərbaycan xalqının tarixinə qızıl hərflərlə yazılmış günlərdən biri də 15 İyun – Milli Qurtuluş Günüdür.

 

Aztibb.az xəbər verir ki, Milli Qurtuluş Günü həm də Azərbaycan xalqı üçün böyük ictimai, siyasi və tarixi əhəmiyyətə malik bir gündür, əsl qurtuluş tarixidir. 1993-cü ilin həmin günü xalqımızın yaddaşında doğma Azərbaycanımızın dağılmaq təhlükəsi ilə üzləşdiyi hadisələrlə qalıb.

 

Böhranlı və ağır vəziyyətdə insanlar yeganə çıxış yolunu yenə də müdrik rəhbərin hakimiyyətə qayıtmasında gördülər. O gün xalqın təkidi və tələbi ilə yenidən hakimiyyətə gələn ulu öndər Heydər Əliyev respublikamızı vətəndaş müharibəsindən, parçalanmadan xilas etdi - ölkəmizin müstəqilliyini qorudu, respublikada baş qaldırmış ictimai-siyasi böhranı aradan qaldırdı və inkişafın təməlini qoydu.

 

Ümummilli Lider Heydər Əliyev hakimiyyətə qayıtdıqdan sonra Azərbaycan böyük inkişaf yolu keçdi. Bu gün milli qurtuluş ideologiyasının təntənəsi müstəqil respublikamızın davamlı inkişafında özünü aydın surətdə göstərir. Hazırda xalqımız bu müdrik siyasətin uğurlu nəticələrini yaşayır.

 

Müstəqil Azərbaycan Heydər Əliyev ideyaları işığında Prezident İlham Əliyevin rəhbərliyi ilə daha yüksək zirvələr fəth edir, Azərbaycanın nüfuzu bütün dünyada artır. Fəth edilən zirvələrdən biri də xalqımızın Ali Baş Komandan İlham Əliyevin ətrafında sıx birləşərək, 30 il həsrətində olduğu doğma Qarabağına qovuşmasıdır.

 

Bu gün biz fəxrlə deyə bilərik ki, bugünkü Azərbaycan məhz Ulu Öndər Heydər Əliyevin görmək istədiyi Azərbaycandır!