Naxçıvan Onkoloji Mərkəzinin Radiologiya şöbəsinin müdiri Əkbər Mehdiyevin anadan olmasının 75, muxtar respublika səhiyyəsindəki fəaliyyətinin 50 illiyinə həsr olunan tədbir keçirilib.

 

Aztibb.az-a Naxçıvan Səhiyyə Nazirliyindən verilən xəbərə görə, yubilyar həkim Naxçıvan Muxtar Respublikası Səhiyyə Nazirliyi tərəfindən təşəkkürnamə ilə təltif edilib və onkoloq-həkimə hədiyyələr təqdim olunub.

 

Tədbirdə Naxçıvan Muxtar Respublikasının səhiyyə nazirinin birinci müavini, nazir vəzifələrini müvəqqəti icra edən Samiq Sadıxov Əkbər Mehdiyevin həyat və yaradıcılığından, elmi-ictimai fəaliyyətindən bəhs edib. Bidirib ki, 15 iyun 1948-ci ildə Babək rayon Məmmədrza Dizə kəndində anadan olan Əkbər Mehdiyev 1967-ci ildə Nəriman Nərimanov adına Azərbaycan Dövlət Tibb Universitetinə qəbul olub, 1973-cü ildə həmin universiteti bitirərək Naxçıvan Respublika Gigiyena və Epidemiologiya Mərkəzində həkim kimi fəaliyyətə başlayıb. 1973-cü ilin ilin noyabr ayında və 1974-cü ilin fevral ayında Rusiyanın Stavropol şəhərində Xüsusi Təhlükəli İnfeksion xəstəlikləri üzrə kurs keçib. Həmin ildən də Azərbaycan Elmlər Akademiyasının Fiziologiya İnstitutunun Radio Biologiya Bölməsinə kiçik elmi işçi olaraq qəbul olunub.

 

Diqqətə çatdırılıb ki, Əkbər həkim 1986-cı ildən Naxçıvan Onkoloji Mərkəzdə çalışır. O, hazırda Radiologiya Şöbəsinin müdiri vəzifəsində fəaliyyətini davam etdirməkdədir.

 

Bildirilib ki, xalqımız tarixən həkimlik sənətinə ən ülvi bir peşə, həkimə müqəddəs bir şəxs kimi baxıb. Sənətini yaxşı bilən, xalqın sağlamlığı keşiyində ləyaqətlə dayanan həkimlərə böyük ehtiram göstərilib. Belə həkimlərdən olan Əkbər Mehdiyevin onkologiya sahəsində xidmətləri danılmazdır.