Kübra Yəhya qızı Fərəcova 16 may 1907-ci ildə Qubada anadan olub. Əvvəl ibtidai rus-tatar məktəbini, sonra isə birillik Tağıyev Qadın Gimnaziyasını bitirib.

 

1924-cü ildə Göyçaya köçən K.Fərəcova iki il burada və Ağdaş rayonunda müəllimlik edib. 1926-cı ildə Qazax rayonunda məskunlaşaraq uşaq bağçasında tərbiyəçilik edib. O, 1929-1933-cü illərdə indiki Azərbaycan Tibb Universitetində oxuyub.

 

Kübra Fərəcova 1931-1979-cu illərdə Azərbaycan SSR Xalq Səhiyyə komissarının müavini, Azərbaycan SSR Səhiyyə naziri, Azərbaycan SSR Ali Soveti Rəyasət Heyətinin katibi və digər vəzifələrdə işləyib.

O, Kürdəmirdə qız məktəbini təşkil edib və müəllim kimi çalışıb. Bu məktəbə 50-yə qədər qız cəlb edən həkimə Kürdəmirdə “Qadın savadsızlığına qarşı mübariz öndərlərdən biri” deyiblər.

K.Fərəcova SSRİ Ali Sovetinin və Azərbaycan SSR Ali Sovetinin deputatı olub.

 

1960-cı ildə Fərəcova Sovet pediatrı və Azərbaycan SSR-in Əməkdar həkimi adlarına layiq görülüb. Həmçinin “Qırmızı Əmək Bayrağı” və “Şərəf nişanı” ordenləri ilə təltif edilib.

 

Həkim 1950-1979-cu illərdə Elmi-Tədqiqat Pediatriya İnstitutuna rəhbərlik edib.

 

K.Fərəcova, həmçinin Ümumittifaq Pediatriya Cəmiyyətinin Rəyasət Heyətinin üzvü, Respublika Pediatriya üzrə Attestasiya Komissiyasının sədri, Pediatriya cəmiyyətinin sədri olub.

 

O, 1988-ci ildə Bakı şəhərində vəfat edib.

 

1992-ci ildə Azərbaycan Respublikası səhiyyə nazirinin əmri ilə Elmi-Tədqiqat Pediatriya İnstitutuna Kübra Fərəcovanın adı verilib.