28 may 1918-ci il – müsəlman Şərqində ilk demokratik respublika olan Azərbaycan Demokratik Respublikası quruldu.

Aztibb.az xəbər verir ki, 105 il əvvəl qurulan Azərbaycan Demokratik Respublikası Avropanın demokratik dəyərləri ilə Şərq mədəniyyətinin xüsusiyyətlərini üzvi şəkildə birləşdirən yeni dövlət və cəmiyyət nümunəsi oldu. Cəmi 23 ay fəaliyyət göstərməsinə baxmayaraq, ilk respublika dövründə qəbul edilən qərarlar, həyata keçirilən tədbirlər müstəqil dövlətçiliyimizin əsaslarının yaradılması və gələcək inkişaf yolunun müəyyənləşdirilməsi baxımından mühüm əhəmiyyət kəsb etdi.

Əhalinin sağlamlığını və rifahını düşünən demokratik hökumətin ilk qərarlarından biri 1918-ci il iyun ayının 17-də Səhiyyə Nazirliyinin yaradılması ilə əlaqədar oldu.

Demokratik hüquq və azadlıqların bərqərar olması, etnik və dini mənsubiyyətindən asılı olmayaraq bütün vətəndaşların bərabər hüquqlarının tanınması, qadınlara seçki hüququnun hətta bir çox Avropa ölkəsindən daha əvvəl verilməsi, Azərbaycan dilinin dövlət dili elan edilməsi, təhsil və mədəniyyətin inkişafına xüsusi diqqət göstərilməsi, nizami milli ordunun, təhlükəsizlik strukturlarının qurulması və görülən digər işlər Azərbaycan Xalq Cümhuriyyəti hökumətinin yürütdüyü siyasətin miqyasını, mahiyyət və mənasını əyani şəkildə səciyyələndirir.

XX əsrin sonlarında Azərbaycan yenidən müstəqilliyinə qovuşdu.

Azərbaycan Demokratik Respublikasının tariximizdəki yeri və roluna xüsusi qiymət verən Ulu Öndər Heydər Əliyev deyirdi: “Biz ilk Demokratik Cümhuriyyətin yaranması gününü əziz tutaraq, onu Azərbaycanın dövlət müstəqilliyi günü – Respublika Günü elan etmişik və bu, bizim milli bayramımızdır”.

Ümummilli Liderin bu siyasətini Prezident İlham Əliyev uğurla davam etdirir və suveren Azərbaycan Respublikası müstəqillik yolunda əzmlə irəliləyir. Xalqımız 28 May – Respublika Gününü böyük qürur və iftixarla milli bayram kimi qeyd edir.