Badımcan dünyanın bir çox ölkələrinin kulinariyasında geniş istifadə olunur. Şərqdə badımcan uzunömürlülük tərəvəzi adlandırılır. Tərkibindəki ürək fəaliyyətinə müsbət təsir göstərən kalium duzları sayəsində yaşlı insanlara və ürək-damar xəstəliklərindən əziyyət çəkənlərə badımcanın istifadəsi məsləhət görülür. Badımcandan hazırlanmış yeməklərin müntəzəm istifadəsi duz balansına xeyirli təsir edir. Buna görə də, maddələr mübadiləsinin pozulması zamanı badımcan pəhrizinə riayət etmək tövsiyə olunur. Badımcan qaraciyər və böyrək, mədə-bağırsaq traktı xəstəliklərinə qarşı mübarizədə kömək edir.

Aztibb.az xarici tibb saytlarına istinadla xəbər verir ki, badımcan xolesterinin səviyyəsini aşağı salır. O, güclü təmizləyən xlorogen turşusu mənbəyidir. Bu turşu həmçinin virus, xərçəng və mikrob əleyhinə xüsusiyyətlərə malikdir.

Beyinin sağlamlığını gücləndirir. Müəyyən edilib ki, badımcanın müntəzəm istifadəsi yaşlı insanlarda əqli pozuntusunun azaldılmasına kömək edir.

Xərçəngə qarşı mübarizə aparır. Badımcanda olan polifenolların antimikrob təsirlərə malik olduğu aşkar edilib. Antioksidantlar hüceyrələri sərbəst radikalların yaratdığı zərərlərdən qoruyur, bu da şiş böyüməsinin və xərçəng hüceyrələrinin yayılmasının qarşısını alır və eyni zamanda xərçəng hüceyrələrinin ölümünü təşviq edir.

Diabetə nəzarət etməyə kömək edir. Badımcanda həll olunan karbohidratlar azdır, liflər isə çoxdur, bu da şəkərli diabet xəstələri üçün vacibdir. Aparılan tədqiqatlar badımcanın diabetin müalicəsində və nəzarətində rolunu dəstəkləyir.