TƏBİB-in təşkilatçılığı ilə regionlardakı tibb müəssisələrində toksikoloji və allerqoloji xidmətlərin təkmilləşdirilməsi üzrə layihələr keçirilir.

 

Aztibb.az-a TƏBİB-dən verilən məlumata görə, “Regionlarda toksikoloji və allerqoloji xidmətlərin təkmilləşdirilməsi” layihəsi çərçivəsində TƏBİB-in tabeliyindəki tibb müəssisələrinin həkim-mütəxəssislərindən ibarət Koordinasiya qrupu yaradılıb. Koordinasiya qrupunda Kliniki Tibbi Mərkəzin Toksikologiya şöbəsinin müdiri Azər Maqsudov, şöbənin həkim-toksikoloqu Faiq Süleymanov, Nərimanov Tibb Mərkəzinin həkim-allerqoloqu Rasimə Söyziyeva, Mərkəzin nəzdində olan Uşaq Kliniki Xəstəxanasının Allerqologiya və immunologiya şöbəsinin müdiri Lalə Axundova yer alıb.

 

TƏBİB-in İxtisaslı tibbi yardım departamentinin Xüsusi profilli tibbi xidmətlərin təşkili şöbəsinin təşkilatçılığı, Koordinasiya qrupunun üzvlərinin iştirakı ilə Ucar və Şirvan şəhərlərinə səfər təşkil olunub.

 

Səfər zamanı Göyçay-Kürdəmir və İmişli-Sabirabad rayonlarındakı tibb müəssisələrində çalışan təcili tibbi yardım şöbələrinin həkimləri, həkim-anestezioloq-reanimatoloqlar, həkim-terapevtlər, həkim-pediatrlar üçün seminarlar keçirilib.

 

Seminarlar ilan dişləməsi, uşaqlarda qida allergiyası, dərman zəhərlənməsi, toksik epidermal nekroliz, anafilaktik şok, narkotiklərin sui-istifadəsi, alkoqolla bağlı təcili hallar mövzularını əhatə edib.

 

Seminarlar interaktiv müzakirələrin aparılması ilə davam etdirilib.