Ciddi xəstəlik hesab edilən hemofiliya vaxtında aşkarlanmazsa, ölümlə nəticələnə bilər. Bu gün dünyada hemofiliya xəstəliyinin tanınması və əhalinin kifayət qədər məlumatlandırılması üçün geniş tədbirlər görülür. 17 aprelin Ümumdünya Hemofiliya Günü kimi elan edilməsi bu tədbirlərin ən əlamətdarıdır. Ümumdünya Hemofiliya Günü hazırda dünyanın bir çox ölkəsində, o cümlədən Azərbaycanda qeyd olunur.
Aztibb.az xəbər verir ki, Ümumdünya Hemofiliya Gününün keçirilməsi təşəbbüsü Ümumdünya Səhiyyə Təşkilatı (ÜST) və Ümumdünya Hemofiliya Federasiyasına məxsusdur və ilk dəfə 1989-cu ildə keçirilib. Həmin tarixin seçilməsi Dünya Hemofiliya Federasiyasını yaratmış Frenk Şnaybelin doğum günü ilə əlaqədardır.
Nəinki hemofiliyalı xəstələrin, eləcə də digər qan xəstəliklərindən əziyyət çəkən kişilərin, həmçinin qadınların müalicəyə əlçatanlığını təmin etmək, ictimaiyyətin diqqətini hemofiliya xəstəliyindən əziyyət çəkən insanlara dəstək olmağa cəlb etmək, hemofiliyalı xəstələrə göstərilən tibbi xidmətin keyfiyyətini yaxşılaşdırmaq üçün Hemofiliya Günü ilə bağlı dünyanın bir çox ölkəsində müxtəlif proqramlar və aksiyalar həyata keçirilir.
Hemofiliya qanın laxtalanması prosesinin pozulması ilə əlaqədar olan irsi xəstəlikdir. Xəstəliyin müalicəsi yoxdur, lakin xəstənin orqanizmində çatışmayan qanın laxtalanması amilinin inyeksiya edilməsi yolu ilə xəstəliyin gedişinə tamamilə və uğurlu şəkildə nəzarət edilir. Bu məqsədlə istifadə edilən laxtalanma amili əksər hallarda donor qanından götürülür. Ciddi xəstəlik hesab edilən hemofiliya vaxtında aşkarlanmazsa, ölümlə nəticələnə bilər.