Şirvan Şəhər Mərkəzi Xəstəxanasında 31 Mart – Azərbaycanlıların Soyqırımı Gününə həsr olunmuş konfrans keçirilib.

 

Bu barədə Aztibb.az-a Xəstəxanadan məlumat verilib.

 

Tədbirdə Şirvan Şəhər Mərkəzi Xəstəxanası PHŞ-nın direktoru Kamil Əhmədov çıxış edərək ermənilərin azərbaycanlılara qarşı törətdiyi vəhşiliklər barədə faktlara və tarixi sənədlərə əsaslanan məlumatları diqqətə çatdırıb.

 

Direktor bildirib ki, 105 il bundan öncə martın sonundan başlayaraq Azərbaycanda ermənilər tərəfindən növbəti dəhşətli soyqırımı aktı həyata keçirilib. Ermənilər 1918-ci il martın 31-dən başlayaraq aprelin 3-dək qadın, qoca, azyaşlı demədən azərbaycanlıları ən vəhşi üsullarla qətlə yetiriblər: “Müstəqillik illərimizdə tarixçi alimlərimizin də araşdırmaları nəticəsində çoxsaylı yeni faktlar və sənədlər aşkarlanıb. Məsələn, Quba şəhərindəki kütləvi məzarlıq ən böyük tarixi sübutdur. Üzə çıxmış tarixi faktlar sübut edir ki, 1918-ci ilin mart-aprel aylarında və sonrakı dövrlərdə erməni millətçilərinin həyata keçirdikləri qanlı aksiyaların coğrafiyasının daha geniş, faciə qurbanlarının sayı isə qat-qat artıqdır”.

 

Kamil Əhmədov vurğulayıb ki, Ulu Öndər Heydər Əliyevin siyasi kursunu bütün istiqamətlərdə uğurla davam etdirən Prezident İlham Əliyevin, Azərbaycanın Birinci vitse-prezidenti Mehriban xanım Əliyevanın xalqımızın zəngin tarixinin təbliği istiqamətində atdıqları addımların, həyata keçirdikləri tədbirlərin miqyası olduqca genişdir. Prezident İlham Əliyevin Sərəncamı ilə 2018-ci ilin ölkəmizdə “Azərbaycan Xalq Cümhuriyyəti İli” elan edilməsi də bunun təsdiqidir.