Səhiyyə Hesabları Sisteminin (SHS) tətbiq edilməsində ölkələrə texniki dəstəyin göstərilməsi ÜST-nin prioritetlərindən biridir.

Səhiyyə xərclərinin izlənməsində qlobal lider kimi ÜST ölkə kontekstinin öyrənilməsi, ilkin qiymətləndirmələrin aparılması, yerli potensialın yaradılması və SHS prosesinin davamlılığının təmin olunması üçün Azərbaycana texniki dəstək göstərməyə davam edir.

Aztibb.az-a agentlikdən verilən məlumata görə, bu dəstək çərçivəsində ÜST-nin Ölkə Ofisi tərəfindən Azərbaycanda Səhiyyə Hesabları Sistemi üzrə İşçi Qrupu yaradılıb.

İcbari Tibbi Sığorta üzrə Dövlət Agentliyinin də təmsil olunduğu İşçi Qrupunun onlayn görüşünə Agentliyin İdarə Heyəti sədrinin müavini Nigar Bayramova və qurumun digər əməkdaşlar qatılıblar. Səhiyyə Hesabları Sisteminin əhəmiyyətindən danışan N.Bayramova bunun səhiyyə xərclərinin hesablanması və maliyyələşdirmə mənbələrinin formalaşdırılmasında xüsusi rolu olduğunu vurğulayıb.

Qeyd edək ki, İşçi Qrupunun tərkibinə Azərbaycan Respublikası Maliyyə Nazirliyi, Azərbaycan Respublikası Səhiyyə Nazirliyi və Dövlət Statistika Komitəsinin əməkdaşları da daxildir.