Azərbaycan Tibb Universitetinin (ATU) Tədris Cərrahiyyə Klinikasında təlim-tədris proseslərinin idarəedilməsi üzrə Elmi Şura yaradılıb.
ATU-dan Aztibb.az-a verilən xəbərə görə, Elmi Şuranın yaradılmasında əsas məqsəd tədris planının qurulması, elmi-tədqiqat və təlim-tərbiyə məsələlərinin müzakirəsinin təşkilidir.
Klinikanın Elmi Şurasının sədri- Tədris Cərrahiyyə Klinikasının direktorunun müalicə işləri üzrə müavini, professor Fariz Camalov, katibi - direktorun elmi işlər üzrə müavini, professor Davud Pənahov, üzvləri isə II Cərrahi xəstəliklər kafedrasının dosenti Elçin Abdinov, Üz-çənə cərrahiyyəsi kafedrasının professoru Çingiz Rahimov, I Cərrahi xəstəliklər kafedrasının professoru Nuru Bayramov, II Cərrahi xəstəliklər kafedrasının professoru Xaləddin Musayev seçiliblər.
Klinikanın direktoru, dosent Mücahit Avcilin sözlərinə görə, belə bir qurumun yaradılması və fəaliyyəti çox əhəmiyyətlidir. Çünki ATU-un Tədris Cərrahiyyə Klinikasında vətəndaşlarımıza keyfiyyətli tibbi xidmətlər göstərilməsi ilə yanaşı, tələbələrin təhsili üçün də hərtərəfli şərait yaradılıb: "Tələbələrin elmi işləri üçün klinikada şərait yaratmaq bizim fəaliyyətimizin əsas istiqamətlərindən birini təşkil edir. Əminəm ki, yeni yaradılmış Elmi Şurada təmsil olunan tanınmış və peşəkar həkimlərimiz, alimlər qurumun fəal və effektiv fəaliyyəti üçün böyük işlər görəcəklər”.