Naxçıvan Dövlət Universitetində (NDU) Tibb fakültəsinin baş müəllimi Malik Əliyevin 70, Təməl tibb fənləri kafedrasının dosenti Südabə Həsənovanın isə 60 illik yubileyləri qeyd edilib.

NDU-dan Aztibb.az-a bildirilib ki, bu münasibətlə keçirilən tədbirdə ali təhsil müəssisəsinin rektoru Elbrus İsayev muxtar respublikada bütün sahələrlə yanaşı, səhiyyə sisteminin də daim dövlətin diqqət və qayğısı ilə əhatə olunduğunu bildirib.

Diqqətə çatdırılıb ki, hər iki müəllim səhiyyə sisteminə və tibb təhsilinin formalaşdırılmasına layiqli töhfələr verib.

Rektor yubilyarları təbrik edərək, onlara universitetin Fəxri fərmanını təqdim edib.

Daha sonra Tibb fakültəsinin dekanı, biologiya üzrə fəlsəfə doktoru, dosent Elsevər Əsədov, Təməl tibb fənləri kafedrasının müdiri, tibb üzrə fələsəfə doktoru İlhamə Mustafayeva və Ümumi təbabət və klinik fənlər kafedrasının professoru İsa Abdullayev yubilyarların ünvanına xoş sözlər səsləndirərək, onları təbrik edib, hər iki müəllimə uzun ömür can sağlığı arzulayıblar.

Sonda yubilyarlar çıxış edərək tədbirin baş tutmasında əməyi keçənlərə minnətdarlıqlarını ifadə ediblər.