“Körpə Dostu Klinikası” təşəbbüsü çərçivəsində tibb müəssisələrində aparılan monitorinqlərin nəticələri açıqlanıb

07.02.2023 15:45

Tibbi Ərazi Bölmələrini İdarəetmə Birliyinin (TƏBİB) tabeliyindəki “Yeni klinika” tibb müəssisəsində UNICEF-lə birgə keçirilən tədbirdə "Körpə Dostu Klinikası" meyarlarına ən uyğun müəssisələr açıqlanıb.

Aztibb.az TƏBİB-ə istinadla xəbər verir ki, tədbirdə TƏBİB-in İcraçı direktorunun müavini Araz Nəsirov, Beynəlxalq əməkdaşlıq departamentinin rəhbəri Ramin Ağayev, İlkin səhiyyə və təcili yardım departamentinin Ana və uşaq sağlamlığı şöbəsinin müdiri Sevinc Məmmədova, Ana və uşaq sağlamlığı şöbəsinin böyük məsləhətçisi Şəbnəm Şahgəldiyeva, İcbari Tibbi Sığorta üzrə Dövlət Agentliyinin Beynəlxalq əlaqələr departamentinin rəhbəri Ruslan Abdullayev, Yeni klinikanın direktoru vəzifəsini icra edən baş həkim Cavid Paşayev, tibb müəssisələrinin rəhbər şəxsləri, eləcə də UNICEF-in Azərbaycandakı nümayəndəsinin müavini Viliam Abi Abdallah, Səhiyyə və qidalanma proqramının rəhbəri Töhfə Cəmilova, proqramın konsultantı Vəfa Ağayeva və digər əməkdaşlar iştirak edib.

Çıxışlar zamanı “Körpə Dostu Klinikası” təəşəbbüsü çərçivəsində görülən işlər və ana südü ilə qidalandırmanın əhəmiyyəti barədə danışılıb. Bütün dünyada olduğu kimi ana və uşaq sağlamlığı məsələsi ölkəmizdə də səhiyyənin prioritet istiqamətlərindən biri olduğu qeyd edilib. Layihənin əsas məqsədinin ildən-ilə daha çox körpənin ana südü ilə qidalandırılmasına nail olmaq, yenidoğulmuşlara xidmət göstərilən müəssisələrdə ana südü ilə qidalandırma praktikasının qorunması, təşviq edilməsi və dəstəklənməsindən ibarət olduğu bildirilib.

2021-2022-ci illərdə UNICEF-lə əməkdaşlıq çərçivəsində Bakı, Abşeron, Sumqayıt, Ağcabədi, Ağsu, Bərdə, Gəncə, Quba, Lənkəran, Mingəçevir, Şamaxı, Şəki və Şirvanda yerləşən tibb müəssisələrində “Ana südü ilə qidalandırmağa doğru 10 addım" təlimlərinin keçirildiyi vurğulanıb.

Daha sonra layihə çərçivəsində tibb müəssisələrində aparılan monitorinqlərin nəticələri açıqlanıb. Nəticələrə əsasən, Lənkəran Regional Perinatal Mərkəzi, Quba Regional Perinatal Mərkəzi, Ağsu Rayon Mərkəzi Xəstəxanası, Mingəçevir Rayon Mərkəzi Xəstəxanası, Abşeron Rayon Mərkəzi Xəstəxanası, Pirallahı Tibb Mərkəzi, Nizami Tibb Mərkəzinin tabeliyindəki 7 nömrəli Doğum Evi, Respublika Perinatal Mərkəzi, Şəki Regional Perinatal Mərkəzi, Sumqayıt Regional Perinatal Mərkəzi fərqlənən tibb müəssisələri kimi ön sırada qərarlaşıb.