Qurumlararası əməkdaşlıqla bağlı Koordinasiya Şurasının yaradılması ilə əlaqədar Bakı Şəhəri üzrə Təhsil İdarəsində (BŞTİ) görüş keçirilib.

 

Bu barədə Aztibb.az-a TƏBİB-dən məlumat verilib.

 

Görüşdə BŞTİ-nin müdiri Mehriban Vəliyeva, TƏBİB-in İcraçı direktorunun müavini Anar İsrafilov, Sosial Xidmətlər Agentliyinin İdarə Heyətinin sədri Vüqar Behbudov, Bakı Şəhər İcra Hakimiyyəti başçısı Aparatı İctimai-siyasi, humanitar məsələlər və dini qurumlarla iş şöbəsinin müdiri Elmin İmanov, İdarənin struktur bölmə rəhbərləri və digər qonaqlar iştirak ediblər.

 

Görüşdə BŞTİ-nin müdiri Mehriban Vəliyeva bildirib ki, qurumlararası əməkdaşlıqla bağlı Koordinasiya Şurasının yaradılmasında əsas məqsəd müvafiq qurumların təhsilalanlara, təhsilverənlərə və təhsil prosesinin digər iştirakçılarına dair daxil olmuş məlumatların və müraciətlərin çevik mübadiləsini aparmaq, təxirəsalınmaz tədbirləri təmin etmək, uşaqların müdafiəsi istiqamətində fəal iştirak etmək və əməkdaşlığı daha da genişləndirməkdən ibarətdir.

 

Məktəbəqədər və ümumtəhsil müəssisələrində baş verən hadisələrə qanunvericiliyə uyğun, çevik və təsirli müdaxilənin gərəkli olduğunu vurğulayan tədbir iştirakçıları Koordinasiya Şurasının həyata keçirəcəyi işlərin uşaqların müdafiəsi istiqamətində uğurlu nəticələrə yol açacağına, xoşbəxt cəmiyyətin formalaşmasına töhfə verəcəyinə inandıqlarını bildiriblər.

 

Sonda BŞTİ ilə müvafiq qurumlar arasında əməkdaşlıq Protokolu imzalanıb.