Soyuq fəsillərdə uşaqlar daha tez-tez virus və soyuqdəymə xəstəliklərinə tutulur. Lakin pediatrlar sübut edir ki, əksər hallarda bunun səbəbi virusların artması deyil, uşaqlara düzgün qulluq edilməməsidir.

Rusiyalı pediatr Anna Birka uşaqları xəstəliklərdən qorumaq üçün bəzi çox sadə tövsiyələri verib. 

1. Uşaq soyuq fəsillərdə də hər gün açıq havada gəzməlidir. Bu, immun sisteminin möhkəmləndirilməsi üçün ən sadə və effektli vasitədir.

2. Uşağı çox isti geyindirməyin ki, tərləməsin. Çünki tərləyəndə daha tez xəstələnir.  

3. Uşaq daha tez-tez əllərini yumalıdır. Bu, virusların orqanizmə daxil olmasına mane olur. Hər dəfə bayırdan evə qayıdanda uşaq əllərini və üzünü yaxşı yumalı, boğazını adi su ilə qarqara etməlidir.

4. Soyuq fəsillərdə uşağın qidalanmasında soğan və sarımsağın miqdarını artırmaq lazımdır.  Bu 2 məhsul virus əleyhinə  təsdiq olunmuş təsirə malikdir.

5. Uşaq mütləq kifayət qədər maye qəbul etməlidir. Bu, selikli qişaların nəmliyini təmin edir. Selikli qişalar quruyanda onların bizi mikrob və viruslardan qorumaq qabiliyyəti kəskin azalır.

6. Uşağa yerli-yersiz dərman, vitamin, immuniteti möhkəmləndirən preparatları və s. vermək, boğaz və burun spreylərindən istifadə etməyə ehtiyac yoxdur. Bu, nəinki xəstəliyin qarşısını almayacaq, əksinə onun orqanizmini səbəbsiz yerə yükləyəcək.

7. Uşağın qidalanması çeşidli olmalıdır. Şərt deyil ki, uşaq çox yesin. Əsas odur ki, gündəlik menyuda müxtəlif məhsullar olsun - süd məhsulları, sıyıqlar, meyvə, tərəvəz, ət (balıq, toyuq).

Sonda Anna Birka qeyd edib ki, uşaqların heç xəstələnməməsi mümkün deyil. Bu, təbii prosesdir. Çünki uşağın immun sistemi də uşaqla birlikdə böyüyür və formalaşır. Lakin uşaq daim tez-tez xəstələnirsə, bu da normal sayıla bilməz.