TƏBİB və ADA Universitetinin ortaq hazırladığı “Elmi fəaliyyətin keyfiyyət dəyərləndirilməsində onlayn hesabat sisteminin tətbiqi” layihəsi çərçivəsində hazırlanmış proqram təminatı prototipinin təqdimatı ilə bağlı görüş keçirilib.

TƏBİB-dən verilən xəbərə görə, görüşdə TƏBİB-in Strateji inkişaf departamentinin rəhbəri Yaqut Qarayeva, Strategiya və layihələrin icrasına nəzarət şöbəsinin müdiri Emil İskəndərov, Klinik və elmi tədqiqatlar şöbəsinin məsləhətçisi Fərəh Osmanova, ADA Universitetinin İnformasiya texnologiyaları və mühəndislik fakültəsinin müəllimi Nürəddin Sədili, elmi-tədqiqat müəssisələrinin elmi katibləri və əməkdaşları iştirak ediblər.

Layihə ilə bağlı təqdimatlar olub, özündə "nəşrlər", "şəxsi bilik və bacarıqları", "innovasiyalar" kimi başlıqları birləşdirən, beynəlxalq təcrübəyə əsaslanaraq hazırlanmış "Elmi fəaliyyəti dəyərləndirmə meyarları"ndan istifadə olunmaqla, TƏBİB-in tabeli tibb müəssisələrində elmi fəaliyyətlə məşğul olan əməkdaşların sistemdən istifadə edərək məlumatlarını daxil edə biləcəyi, daxil olmuş məlumatları mərkəzləşmiş qaydada izləmək və statistik təhlillərə tabe tutmaq, nəticədə sağlam rəqabət mühitinin inkişafına, ümumi elmi potensialın ölçülməsi və səhiyyə siyasətinə uyğun yönləndirilməsinə şərait yaradacaq proqram təminatının prototipi nümayiş etdirilib.

Sonda müzakirələr aparılıb və yaranmış suallara aydınlıq gətirilib.