Dekabrın 16-da Azərbaycan Qızıl Aypara Cəmiyyəti, Beynəlxalq Qızıl Xaç və Qızıl Aypara cəmiyyətlərinin Federasiyasının Cənubi Qafqaz ölkələri üzrə nümayəndəliyi və Ümumdünya Səhiyyə Təşkilatının (ÜST) Azərbaycan nümayəndəliyi arasında birgə fəaliyyət planı imzalanıb.

Aztibb.az AZƏRTAC-a istinadla xəbər verir ki, fəaliyyət planını Azərbaycan Qızıl Aypara Cəmiyyətinın vitse-prezidenti Qafar Əsgərzadə, Beynəlxalq Federasiyanın Cənubi Qafqaz ölkələri üzrə nümayəndəliyinin rəhbəri Davron Mukhamadiev və ÜST-nin Azərbaycan nümayəndəliyinin rəhbəri Hande Harmancı imzalayıb.

Fəaliyyət planı fövqəladə hallarda sağlamlıq, risk kommunikasiyası və icmalarla iş, psixi sağlamlıq və psixososial dəstək, sağlam həyat tərzinin təbliği, yoluxucu olmayan xəstəliklərin qarşısının alınması, ana və uşaq sağlamlığı, qurumlararası əməkdaşlıq və koordinasiya, yerli potensialın gücləndirilməsi kimi əsas sahələrdə qarşılıqlı əməkdaşlıq etməyə xidmət edir.