Bir ay əvvəl Sumqayıt Tibb Mərkəzinin (STM) tabeliyində olan Perinatal Mərkəzin qəbul şöbəsinə mürəkkəb akuşer situasiya durumunda 32-33 həftəlik hamiləliyi olan qadın daxil olub. Uşağın qolu doğuş yollarından sallanmış halda idi.
Aztibb.az STM-ə istinadla xəbər verir ki, çətin situasiyada anestezioloq-reanimataloq Yelmar Süleymanov və Mamalıq şöbəsinin müdiri Əminə Məmmədovanın protokol üzrə dəqiq işi nəticəsində ananın və körpənin həyatını xilas etmək mümkün olub. Amma çəkisi 1450 qram olaraq ağır vəziyyətdə doğulmuş körpənin durumu kritik olub.
Məsləhətləşmələr aparılan mütəxəssislərin bədbin proqnozları onu göstərib ki, körpənin qolu amputasiya oluna bilər. Lakin STM-in Perinatal Mərkəzinin Neonatal reanimasiya və intensiv terapiya şöbəsinin komandasının səyi nəticəsində körpə bu gün yarımçıq və xəstə yenidoğulmuşlar şöbəsinə köçürülüb. Bir ay ərzində körpəyə DDL.NEk, septik şok və sair xidmətlər göstərilib.
