Bu gün Ümumdünya Səhiyyə Təşkilatının (ÜST) Səhiyyə Nazirliyi, İcbari Tibbi Sığorta üzrə Dövlət Agentliyi (İTSDA) və TƏBİB-lə birgə əməkdaşlıq çərçivəsində təşkil etdiyi Tibb bacısı və mamalığın gücləndirilməsi üzrə Azərbaycan simpoziumunun açılış mərasimi keçirilib.
Aztibb.az xəbər verir ki, simpoziumun məqsədi dünyada tibb bacısı və mamalıq təcrübəsi və təhsilində yenilik, islahat və dəyişiklikləri bölüşmək, həmçinin ÜST-nin “Tibb bacısı və mamalıq üzrə qlobal strateji istiqamətlər”ində müəyyən edilmiş sahələr üzrə Azərbaycanda tibb bacısı və mama işinin vəziyyətini müzakirə etmək olub.
Açılış mərasimində ÜST-nin eksperti Halil İbrahim Durak, Səhiyyə Nazirliyinin Səhiyyənin Təşkili Şöbəsinin müdiri Fazil Hüseynbəyov, İTSDA-nın Analitika və Statistika Şöbəsinin müdiri Rəşad Çobanlı, TƏBİB-in icraçı direktorunun müavini Anar İsrafilov və Azərbaycan Tibb Universitetinin İctimai Səhiyyə Fakültəsinin dekanı Anar Ağayev çıxış ediblər.
Simpozium çərçivəsində “Tibb bacısı və mamaların göstərdiyi xidmətlər və vəzifələri” (12 dekabr), “Tibb bacısı və mamalıq təhsili” (13 dekabr) və “Liderlik” (14 dekabr) mövzularında 3 panel müzakirəsi keçiriləcək. Bu müzakirələr ÜST Azərbaycanın feysbuk səhifəsində saat 09:00-dan etibarən canlı yayınlanacaq. Simpozium ərzində, həmçinin müxtəlif forum və təlim kursları baş tutacaq.