Dəriyə qulluq vasitələrindən biri olan skrab dəri eksfoliasiyasında (dərinin üst qatının soyulması və yenilənməsi) əvəzedilməzdir. Skrabların üz və bədən üçün növləri mövcuddur. Lakin skrabın istifadəsi hər kəsə tövsiyə olunmur.

Aztibb.az xəbər verir ki, dermatoloq Leyla Zülfüqarova hansı hallarda skrabdan istifadənin məsləhət görülmədiyi ilə bağlı paylaşım edib.

Həmən paylaşımı təqdim edirik:

Quru dəri sahibləri (kseroz) - belə dərini bərpa etmək, nəmləndirmək lazımdı, skrablamaq yox.

Həşərat dişləməsindən sonra - siz həşəratın tüpürcəyini (və tərkibindəki zəhəri) dəriyə yayacaqsınız, buna görə qaşınma sahəsi də böyüyəcək.

Günəş yanıqlarında - skrab dərini daha çox zədələyəcək.

Dermatoloji xəstəliklər zamanı - skrabdan istifadə xəstəliyin gedişatını ağırlaşdıracaq.

Dəridə yara və eroziyalar olduqda - yaraların üzəri yenicə qabıq bağladıqda bu qabığa dəyməmək tövsiyyə olunur, çünki yara daha gec sağalacaq və yerində çapıq qalma ehtimalı artacaq.

Əgər dəriyə qulluq vasitələrinin seçimində çətinlik çəkirsinizsə kosmetoloqa müraciət edin.