Sumqayıt şəhərində qış mövsümünə hazırlıqla bağlı Sumqayıt şəhər İcra Hakimiyyəti başçısının yanında şuranın iclası keçirilib.

 

Aztibb.az-ın xəbərinə görə, iclasda Sumqayıt Tibb Mərkəzinin (STM) direktoru Səkinə Sadıxova çıxış edib.

 

S.Sadıxova bildirib ki, STM-in tabeliyində olan bütün tibb müəssisələrində 2022-2023-cü ilin payız- qış mövsümünə hazırlıq işləri aparılıb və hazırda da bu işlər davam etdirilməkdədir. Tibb müəssisələrinin binasında və digər köməkçi strukturlarda payız-qış mövsümünə hazırlıqla əlaqədar görüləcək işlər barədə tədbirlər planı tərtib edilib və bu işlərə cavabdeh şəxslər təyin edilib.

 

Direktor vurğulayıb ki, tədbirlər planına əsasən qazanxana operatorları ilə (ocaqçılarla) əməyin mühafizəsi sahəsində təlimatlar keçirilib, biliklərinin yoxlanılması üçün müvafiq kurslara cəlb ediliblər.

Yanğınəleyhinə mühafizə vasitələrinin işlək vəziyyətdə olması təmin edilib. Tibb müəssisələrinin istiliklə təchiz olunmasına görə müvafiq tədbirlər həyata keçirilib, istilik sistemlərinin qazanxanaların işlək vəziyyətdə olması üçün müvafiq işlər görülüb və hazırda da bu işlər nəzarətdə saxlanılaraq davam etdirilir.

 

Bununla yanaşı, tTibb müəssisələrinin maddi- texniki bazasının möhkəmləndirilməsi, şöbə və struktur bölmələrin təchizatının yaxşılaşdırılması, bina və həyətyanı sahələrdə abadlaşma işlərinin aparılması sahəsində tədbirlər görülüb. Bütün tibb müəssisələrində iməciliklər keçirilib, həyətyanı sahələr təmizlənir, quru ağaclar kəsilir, abadlaşdırma işləri aparılır. Hal-hazırda əksər tibb müəssisələrində cari təmir və abadlaşdırılma işləri davam etdirilir.

 

Onun sözlərinə görə, 2 nömrəli Ailə Sağlamlıq Mərkəzinin, 3 və 4 nömrəli şəhər xəstəxanalarının əsaslı təmirə ehtiyacı vardır. 1 nömrəli şəhər xəstəxanası, Təcili Tibbi Yardım Xəstəxanası və 4 nömrəli Ailə Sağlamlıq Mərkəzində ilin sonuna kimi cari təmir işlərinin aparılması nəzədə tutulub.

 

S.Sadıxova qeyd edib ki, tibb müəssisələri müvafiq yumşaq və bər inventarlarla təmin olunub. Əksər tibb müəssisələrində su-kanalizasiya xətləri qənaətbəxş vəziyyətdədir, bütün tibb müəssisələrində sistemin nasazlığının aradan götürülməsi üçün cari təmir işləri aparılır. Payız-qış mövsümünə hazırlığa dair müvafiq tədbirlərin icrası daim Sumqayıt Tibb Mərkəzinin nəzarətində saxlanılır.

 

Müəllif: Səadət Məmmədova