Erkən menopauza (klimaks) keçirən qadınlarda koronar ürək xəstəliyi, periferik arteriya xəstəliyi, insult və ürək çatışmazlığı hallarına daha sıx rastlanır. Bunun səbəbi menopauza zamanı estrogen hormon istehsalının dayanmasıdır.

 

Bu barədə Aztibb.az-a Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev bildirib.

 

 

Cabir Gülmalıyev qeyd edib ki, estrogen hormonunun ürək sağlamlığına böyük qoruyucu təsiri var. Estrogen yaxşı xolesterolu artırır və pis xolesterolu aşağı salır. Damar divarlarında bəzi maddələr ifraz edərək damarları daha sağlam edir. Ancaq postmenopozal dövrdə qadınlar ürək-damar xəstəlikləri riski altındadır, çünki estrogen istehsalı demək olar ki, dayanır.

 

"Erkən klimaks keçirən qadınlar mütəxəssis dəstəyi almalıdır. Müalicə alsanız da, almasanız da, balanslaşdırılmış pəhriz, məşq və vitamin əlavələri simptomlarınızı azaltmağa və ürək sağlamlığınızı qorumağa kömək edə bilər", - deyə uzman həkim əlavə edib.

 

Müəllif: Nərgiz Qəhrəmanova