Hər il Türkiyədə keçirilən Beynəlxalq Türk dünyası Dağınıq Skleroz Konqresinin növbəti toplantısının Bakıda Azərbaycan Tibb Universitetinin (ATU) ev sahibliyi ilə baş tutacağı planlaşdırılır.
Aztibb.az ATU-nun rəsmi feysbuk səhifəsinə istinadla xəbər verir ki, bu barədə ATU-nun rektoru professor Gəray Gəraybəylinin Türkiyənin Sağlamlıq Elmləri Universitetinin nümayəndə heyəti ilə görüşü zamanı müzakirə aparılıb.
Sağlamlıq Elmləri Universitetinin nevrologiya üzrə mütəxəssisi, professor Şərəf Dəmirkaya görüşdə artıq dörd ildir keçirilən Beynəlxalq Türk Dünyası Dağınıq Skleroz Konqresi barədə məlumat verərək bu tədbirin məqsədinin Türkiyə və türkdilli ölkələrdə dağınıq skleroz sahəsində çalışan mütəxəssislərin arasında bilgi mübadiləsinin təşkil etməkdən ibarət olduğunu bildirib. Professor Ş.Demirkaya ilk Konqresin 2019-cu ildə Ankarada keçirildiyini, sonradan tədbirə dost və qardaş ölkələrdəki məsləkdaşları tərəfindən böyük diqqət olduğunu nəzərə alaraq növbəti illərdə tədbirin hər dəfə başqa bir ölkədə keçirilməsi nin qərar alındığını deyib. Artıq 4-cü toplantı ötən il Özbəkistanın Səmərqənd şəhərində gerçəkləşdirilib. Professor Ş.Demirkaya beşinci beynəlxalq toplantının isə ATU-nun ev sahibliyi ilə Bakıda təşkil edilməsini təklif edib.
ATU-nun rektoru professor Gəray Gəraybəyli qonaqlara təklif üçün təşəkkür edərək universitet tərəfindən bu konqresin Bakıda təşkili üçün zəruri addımların atılacağnı bidlirib. Rektor qeyd edib ki, belə bir beynəlxalq tədbirin Bakıda təşkili bu sahədə işləyən mütəxəssislərin təcrübəsini paylaşması, həm də ortaq çalışma və araşdırmalarla ölkələr arasındaki işbirliyini gücləndirmək üçün gözəl imkandır. Professor G.Gəraybəyli 2023-cü ilin iyununda ölkəmizdə keçiriləcək Beynəlxalq Türk Dünyası Dağınıq Skleroz Konqresinin həm Azərbaycan, həm də türk dünyasındakı nevroloqların işinə önəmli töhfə verəcəyindən əminliyini vurğulayıb.
Daha sonra Sağlamlıq Elmləri i Universitetinin Klinik Psixologiya kafedrasının rəhbəri, dosent Aynur Feyzioğlu görüş iştirakçılarına Buxara Dövlət Tibb Universiteti ilə birgə görülən işlər, ortaq layihələr barədə məlumat verib. O, gələcəkdə Azərbaycan Tibb Universiteti ilə də birgə layihələr reallaşdırıla biləcəyini qeyd edib.
Görüş iştirakçıları 2023-cü il iyun ayında Bakıda 5-cü Beynəlxalq Türk Dünyası Dağınıq Skleroz Konqresinin təşkilinin təfərrüatlarını müzakirə ediblər. Tədbirin təşkili ilə bağlı fikir mübadiləsində həmçinin ATU-nun Elmi işlər üzrə prorektoru Rauf Bəylərov, Beynəlxalq əlaqələr üzrə prorektor Orxan İsayev, ATU-nun nevrologiya kafedrasının müdiri Aytən Məmmədbəyli, Rəhim Əliyev iştirak ediblər.
