Aztibb.az "Həkimlərimizi tanıyaq!" rubrikasında Mingəçevir Şəhər Mərkəzi Xəstəxanasının həkim qastroenteroloqu İlham Mayılovu təqdim edir: 

İlham Mayılov 1955-ci ildə anadan olub. 1972-1978-ci illər ərzində Azərbaycan Tibb İnstitutunun Müalicə proflaktika fakültəsində təhsil alıb. 1978-1979-cu ildə 1 saylı Şəhər Klinik Xəstəxanasının Terapiya şöbəsində internatura keçib. 1979-1983-cü illərdə Mingəçevir ŞMX-nın Təcili Tibb Təxirəsalınmaz Yardım çağırışçı həkim kimi fəaliyyət göstərib. 1983-cü ildə Mingəçevir ŞMX-nın Poliklinika şöbəsində sahə həkimi işləyib, həmin ilin noyabr ayında müsabiqə yolu ilə xəstəxananın Qastroenterologiya şöbəsinin şöbə müdiri vəzifəsinə keçib.

Qastroenteroloq İlham Mayılov ixtisası üzrə mütəmadi olaraq kurslarda iştirak edib. O, 1984-cü ildə Ukrayna Respublikasında, 1987-ci ildə Rusiya Federasiyasının Leninqrad vilayətinin Həkimləri Təkmilləşdirmə İnstitutunda Qastroenterologiya üzrə Təkmilləşmə kursu keçib.

Təcrübəli həkim İlham Mayılov 1987-ci ildə Azərbaycan Respublikası Səhiyyə Nazirliyi nəzdində olan attestasiya komissiyasından keçərək birinci dərəcəli, 1998-ci ildə isə Ali dərəcəli Qastroenteroloq adına layiq görülüb.
Peşəkar təbib olmaqla bərabər İlham həkimin idarəçilik bacarıqları da yüksəkdir. Bu səbəbdən uzun illər xəstəxananın idarəçiliyində onun rolu olub. Belə ki, İlham Mayılov 2011-2016-cı illərdə Mingəçevir ŞMX-nın Baş həkiminin Müalicə İşləri üzrə müavini vəzifəsini, 2017-ci ildə Direktorun Müalicə İşləri üzrə müavini-Baş həkim vəzifəsini icra edib. 2018-ci ildən etibarən Poliklinika şöbəsində həkim Qastroenteroloq vəzifəsində fəaliyyətini davam etdirir.

Müəllif: Səadət Məmmədova