Akademik Zərifə Əliyeva adına Milli Oftalmologiya Mərkəzinin Avtomobil Səyyar Klinikası Ədliyyə Nazirliyində tibbi aksiya keçirib. Aksiya çərçivəsində ədliyyə işçiləri arasında oftalmoloji müayinələr aparılıb.
Mərkəzin Elmi-məlumat, tədris və təşkilati-metodik bölməsindən verilən xəbərə görə, ədliyyə işçilərinin peşə bayramı münasibətilə keçirilən aksiya zamanı 80 nəfər müayinə olunub. Müayinədən keçənlərdə refraksiya patologiyası, allergik konyunktivit, quru göz sindromu və s. diaqnozlar aşkarlanıb.
Aksiyanın keçirilməsində əsas məqsəd vaxt itirmədən, yerindəcə operativ şəkildə pasiyentlərin müayinə-müalicə edilməsi, korluğun qarşısının alınması, görmə patologiyasının erkən diaqnostikasının aşkarlanması, göz xəstəlikləri ilə bağlı monitorinqlərin aparılması, qeydə alınan problemlərin həll olunmasıdır.
Müayinələr akademik Zərifə Əliyeva adına Milli Oftalmologiya Mərkəzinin həkimləri - Mirana Mirişova və Nuranə Nuriyeva tərəfindən aparılıb.
