Birləşmiş Millətlər Təşkilatının Baş Məclisi 1959-cu ildə Uşaq Hüquqları Bəyannaməsini qəbul etdi. 1989-cu il noyabrın 20-də isə, uşaqların hüquqlarını qorumağa dair mükəmməl beynəlxalq sənəd Uşaq Hüquqları Konvensiyası qəbul olundu. 54 maddədən ibarət konvensiya uşaqların əsas hüquqlarını təmin edərək bütün vətəndaşları uşaqların sağlam, təhlükəsiz gələcəyi üçün çalışmağa çağırır. O vaxtdan bəri 20 noyabr dünyada uşaq bayramı, uşaqların hüquqlarının və sağlamlığının qorunması günü kimi qeyd edilir, bu istiqamətdə müxtəlif tədbirlər keçirilir, həkimlər uşaqların sağlamlığının qorunması ilə bağlı tövsiyələr verirlər. Bu günün qeyd olunmasında məqsəd uşaqlar üçün beynəlxalq həmrəyliyi və onların sağlamlığını daha da inkişaf etdirməkdir.